De Döschkassen

Anmerkungen

Digitaliseerung. Dat is je anschien’d ’n Woord, mit dat man as Politiker wiesen kann, dat man mit de Tied geiht, ne. Overs dat Woord fallt ut veele Politikers eenfach so rut un denn is dat wech.

Nu ward je ook veel vun de Digitaliseerung an Schooln snackt. In der ersten Monot‘ vun de Corona-Krise, in de meist keen Kind no School gohn is, weer je genog Tied de Schoolgebüüd digitaler to moken. Geld weer ook genog dor. Blots togreepen hett dor meist keen School op – op’t Land erst recht ni. De Verantwordlichen harrn wohrschienli Wichtigered to tohn.

As ick no Schooln gung, as dat noch ni mol Internet geev, dor hebbt wi al Programmeern lehrt. Dat hebbt wi overs blots lehrt, weil een vun uns‘ Schoolmasters dor sien Frietied för opwenn’d hett. He hett nömli meent, dat wi dat in Tokunft bruuken wurrn.

Weil de Schoolleitung em overs blots mitleidig ankeeken hett, kreeg he so weni Geld för sien Idee, dat wi op Reekners programmeert hebbt, de dormols al in’t Museum heuert harrn.

Kannst mol sehn, de goode ole Herr Schmidt hett dat vör över 30 Johrn al wusst. Dörsett hett sick sien Ansicht bet hüüt overs ni so recht.

In de School schüllt de Kinner je wat för de Tokunft lehrn. De Schooln sülms doht sick mit dat Lehrn för de Tokunft overs recht wat schwörer.

Klor gifft dat Schooln, de to’n Bispeel Tablet-Reekners insett, un de düüer vun de Öllern betohln lött.

Regelmäßi insett ward de Dingers overs lang ni, un funktschoneern deiht dat Ganze ook oftmols ni so richti. De Schuld doran hebbt denn natüürli jümmers anner Lüüd. Schier!

Overs dormit, mol ’n anstänniged Machtwoord to spreeken, doht sick de Kultusministers schwor.

Tscha. Schient so, as wenn sick de Tokunft annerwegens afspeelt. Veellicht kann man mit de Technik je weenstern den Tofeldeenst organiseern. Denn so as dat utsüht, ward de Schölers bi uns noch lang mit Kritt un Tofel to dohn hebben.

Vellicht kunnen de Schoolleiters je eenfach mol in’t Internet nokieken, wo dat mit de Digitaliseerung löppt. De Schöölers künnt ehr wiss wiesen, wo man mit‘ Internet ümgeiht...

In düssen Sinn