De Döschkassen

Anmerkungen

Düsse Week heff ick an ’n Kass‘ in Supermart so’n Opsteller mit Duftgenöög för’t Auto sehn. Dor weern ’n poor vun de dorsten „Wunnerbööm“, also Pappbööm, över de man sick eegentli blots wunnern kann, overs ook Duftklemm‘ un denn noch Duft-„Wraps“. Wat genau so’n Wrap ween schall, weet ick ni. Jedenfalls weer dat all so’n Duft-Krom, den man sick in’t Auto hangen oder den man sick klemmen kann.

Fröher, as jungen Autofohrer, heff ick ook ’n poor vun düsse Duftdingers utprobeert. To’n Bispeel so’n Pappboom mit den Duft „New Car“. Dat is „Niedet Auto“ op Ingelsch, dormit dat ook ingelsche Lüüd verstohn künnt.

De Hoken doran weer, wat dat keen Stück no ’n niedet Auto rüükt hett. Tominst no keen niedet Auto, dat mi betlang  ünnerkom‘ is. Veelicht schall de Dunst je doch eher ’n gebruukted niedet Auto immiteern, dat de besten Johrn al achter sick hett. Annerlei, den Duft gifft dat jümmers noch. Jüst so as den Vanilleduft, de mi dormols meist in de Oogen brennt hett.

Dat geev dor overs ook den nieden Duft „Black Ice“, also swatted Ies.

Hmm. Wat ick weet, rüükt Ies no gor nix. Dat kümmt wohrschienli dorop an, womit man dat Ies düster farvt hett. Veellicht mit Brummelbeern. Veellicht overs ook mit Kattenschiet. Man weet dat ni.

Dor geev dat ook den Duft „Supernova“. Oha. Ick weet, dat ’n Supernova, wenn man dor to dicht bi steiht, een geheueri den Dag versaun kann. Overs ick heff ganz un gor keen Idee doröver, wo so’n grooten Rumms rüüken deiht.

Wat geev dat Noch? Och jo, „Summer Cotton“. Äh, Boomwull in Sommer? Dat lot ick mol so stohn.

Un ook scheun: „Sportfrische“! Also, ick bün mi seeker, dat Lüüd no’n Sport allns annere as frisch rüükt.

To den Duft „Midnight Chic“ will mi ook ni recht wat infalln.

Overs dat mokt je ook nix. Denn dat gifft je jümmers weller niede junge Autofohrers. Un so lang sick jedeneen vun de blots eenmol so’n Duft-Dings köfft, över dat se sick achteran anstänni wunnert, finnd de Wunnerduft-Produzenten dat ganz seeker richti „dufte“…

In düssen Sinn