De Döschkassen

Beschreibung der Episode

Vör twee Johr heff ick mi ’n nieded Smartfohn köfft, in so’n ganz bekannten Elektronik-Loden. Un vun den Verkööper heff ick mi to den Ackersnacker noch ’n Anti-Vier’n-Programm andreihn loten. Dat kunn ick ook för mien Kompjuter to Huus un so wieder insetten. Ganz wat Gooded schull dat ween, un blots fief Euros schull dat kosten.
De Verkööper weer so fründli, un ick heff mi dorop inloten. Op de fief Müüs keem dat nu ook ni mehr an.
Üm dat Schutz-Programm to aktiviern, heff ick to Huus noch düt un dat ingeeven musst. Ook mien Bankverbinnung. Ick geev to, wat ick mi dat allns ni so ganz genau dörleest heff, as dat nu mol so is, bi so veeled, to dat man hüütigendogs tostimm‘ mutt.
Tscha, een Johr wieder hett de Anti-Vier’n-Firma sick denn overs mitmol 129 Euros vun mien Konto holt. Dat weer ’n düchtigen Sprung vun fief Euros. Ick wull mi dat noch trüchholn, overs in’t Lüttgedruckte harr ick dat allns to Anfang tostimmt.
Dat Geld weer wech. Dor wull ick den Schiet direkt künnigen. Also bün ick op de Internet-Sied vun de Firma gohn. Irgendwat mit Affe un Mäck weer de Noom, meen ick. Annerlei.
Dor jedenfalls, wonehm dat op de Sied no de Künnigung gohn schull, keem blots de Mellung, „diese Seite kann nicht angezeigt werden“.
Hmm. No dat ick mi denn dör ettliche Internetforums leest harr, keem ick op de Lösung. Tehmli figeliensch weer dat, ganz versteekt.
Un denn gung dat los. Siet de Künnigung, keem jede Week mehrere E-Mails vun de Open-Firma. Ick schull doch blieven un op den Schutz ni verzichen. Un denn gung de Pries no ünnen. Intwüschen schall ick blots noch even över 30 Euros in’t Johr betohn. Ach wat, mit 30 Euros reekend sick de Krom anschiend ook.
Overs de künnt mi mohl dor kleihn, wonehm de Sünn ni schient.
An’t Enn vun dat Kapitel froog ick mi: Wenn de dorste Firma een vör Vier’n ut‘ Internet schützen schall, wokeen schützt een denn vör de Firma?

Un vun den Elektronik-Loden lot ick mi ni nochmol so’n Plünnkrom andreihn. Ick bün doch ni bleud…

In düssen Sinn